سفر بدون نكد

💑 سفر بدون نكد 💑

مبدئيًا في أشياء تجعلكم سعداء وتتعلموا منها الكثير وتساعدكم على توطيد علاقتكم ببعض ، منها السَفر بكل تأكيد ولما يكون السفر مع شريك حياتك الحب أكيد يترك أثر إيجابي في حياتكم أنتم الاثنين، او احيانا الميانة و التعود ننسى نفسنا و ما نتكلم عن رحلتنا القادمة و نتفق في اشياء مهمة و نتورط و احنا هناك ،، و تتحول الرحلة السعيدة الى نكد. هذا المقال حنتكلم عن أهم النقاط في نظرنا الي تهم كل اثنين حيسافروا مع بعض بدون ما تتحول رحلتهم كلها لنكد في نكد:

خططوا فين رايحين 🗺

في كثير من الأحيان يكون الزوجين نفسهم يسافرو، بس الأيام والسنين بتمر وهما لسا بيفكرو فين يروحو ؟ ومتى ؟ وكيف ؟ وايش يسوا ؟ وحننبسط ولا لأ ؟ اسئلة كتير تجي في راسنا وتضيع الوقت واحيانا تخلينا مترددين وخايفين ! بس بكل بساطة تخطيطكم للرحلة راح يبعد كتير من المخاوف ولو مو عارفين فين تروحو ابدأو حددو اهتماماتكم اولاً عشان تضمنوا ان الكل يستمتع.  والاماكن الي تبغو تزوروها أو الاشياء الي تبغو تتعلموها من الرحلة عشان ما تحسو انكم طفشانين أو وقتكم ضايع او احدكم يحس انه الرحله هذي مو له وخلوكم مرنين لأي تغيير مفاجئ يسير في الرحلة وانبسطو.

الجوالات مكانها الشنطة او الجيب ☎️

التكنولوجيا لها مزاياها طبعًا، بس كون أنك مسافر مع شريك حياتك، لازم يكون في اهتمام اكبر انكم تجلسو مع بعض مو كل واحد لوحدو على جوالو تويتر او سناب شات،  حقيقة السفر مع شريك حياتك هي أنكم بتنفصلوا عن العالم لفترة باختياركم الشخصي عشان تتعرفوا على بعض أكثر وتتعلمو شي جديد عن بعض ، الحقيقة أن رحلة واحدة مع شريك حياتك ممكن تخليك تشوف أشياء كثيرة ما كنت تدري أنها موجودة فيه ، بس لأن البيئة والروتين من الممكن تغير صفات الإنسان ، زي مانعرف الكلام يجيب كلام ، لازم تحرصوا أن يكون بينكم تواصل واهتمام مستمر ، السوشال ميديا ممكن تقتل الكثير من هذه المميزات في السفر، فا خلي الجوال في جيبك و دائما اتذكروا انكم اليوم هنا عشان بعض.

احترموا الاختلاف 🥰

في السفر راح تشوفوا كل شيء مختلف، الديانات والتقاليد والعادات والأشكال وحتى البيئة والطبيعة مختلفة ، كل هذه الأشياء لها احترامها ، فا من الممتع انكم مع بعض تروحو وتشوفو وتستكشوا هذه الاشياء مع بعض حيكون لها أثر كبير في نفسكم لانكم بتتشاركو الاستكشاف والمعرفة مع بعض ، ولما تشوفو اختلاف الناس عنكم بثقافاتهم أو معتقداتهم حتتعلمو أنو الاختلاف ممكن يكون حلو وجميل حتى لو كان في شخصياتكم وحيسير عندكم تقبل أكبر لبعض. و الاهم .. تقبلوا اختلاف العالم و الناس من حولكم.

السفر جهد 😰

عشان كدا لازم كل واحد يكون متوقع الكثير من المشاق صحيح ممكن تكون اجازة من العمل بس مو صحيح انه السفر مو مُتعب او خالي تماما من الإرهاق.  وطبعًا على حسب نوع الرحلة الي مخططين لها لذلك خلوكم جاهزين لأي مفاجئات وحاولو تكونو هاديين عشان تقدرو تفكرو وتخططوا وتسافرو وتكون رحلتكم سعيدة.

خلوا النوم للبيت 💤

أفضل عدد ساعات نوم تقريبًا 7 ساعات باليوم، عشان كدا يُفضل في أوقات السفر أنكم ما تضيعوا الوقت في النوم، أو واحد ينام والثاني يكون صاحي، أنتم الاثنين مرتبطين ببعض ببعض، فمن الأفضل تصحوا مع بعض وتناموا مع بعض ، ويفضل تصحوا بدري عشان تستغلوا الصباح في الاستكشاف كل ما كانت بداية اليوم بدري ، كل ما قدرتوا تمارسوا نشاطات اكثر وتزورو أماكن أكثر.

اتفقوا في قراراتكم 🙏🏼

أحيانًااختلاف الاهتمامات تسبب تشتت و احيانا تتحول لنكد كبير، كل واحد بيكون يبغى شيء غير الثاني، هذا الشي طبيعي في أي سفرية بين اثنين، الأهم في هذا الوقت ما ترفعوا السكاكين على بعض، بس ممكن تتناقشوا، أعرضوا وجهات نظركم، وحددو الأولويات مع بعض ، ومهم جدًا كل واحد منكم يقدم تنازلات ، ولا تخلو القرارات أنو كلمة مين منكم هي اللي تمشي ، واستمتعوا اكتر شي في السفر.

السفر مو مصاريف على الفاضي 💰

لا تضيعوا فلوسكم في شراء الهدايا ٬ ننصحكم بأن تدفعوا اكثر في التجارب وتعلم شي جديد في الحياة مع الشريك وقضاء أجمل اللحظات مع بعض لصنع الذكريات مميزة لا تنسى سواء كانت صعود قمة أو اكلة جديدة تجربوها سوا ،  

لو عندكم المال متوفر هذا شيء جيد، لكن مو معناه تضيع مالك وتفكر حالك راح تستمتع، الموضوع ببساطة أنك تقدر تستمتع بقرار داخلي من جواك، ما تتخيل أن كثرة التذكارات والشوبينج هو اللي راح يخليكم تستمتعوا فقط، بالتأكيد هذي الأشياء ليها قيمتها ، لكن الامر أولًا وأخيرًا يتعلق برغبة حقيقية في أنك تقضي وقت جميل مع شريك حياتك، لكن الشراء مع شريك حياتك هو اللي ممتع، وجودكم سوا، ورأيكم سوا، وضحكم سوا، كل هاي التفاصيل البسيطة هي اللي راح تفرق.

أخيرًا عزيزي القارئ الحياة جميلة وتستاهل أنك تسافر وتشوف كل جديد في العالم مع حد تحبه وتحب تكون معاه ذكريات تعيش معاكم طول العُمر، ما تكسل.